Rom 4 | NdeIBE | STEP | Pho sizakuthi kuyini u-Abhrahama, ukhokho wethu, akufumanayo kule indaba na?

Romans 4

U-Abhrahama Walungiswa Ngokukholwa.

1 Pho sizakuthi kuyini u-Abhrahama, ukhokho wethu, akufumanayo kule indaba na? 2 Uma, ngempela, u-Abhrahama walungiswa ngamazwi, wayelakho okokuzincoma ngakho – kodwa hatshi phambi kukaNkulunkulu.

3 Kanje uMbhalo uthini na? Uthi, “UAbhrahama wakholwa kuNkulunkulu, njalo kwabalwa kuye njengokulunga.”

4 Nxa umuntu esebenza, umholo wakhe kawubalwa kuye njengesipho, kodwa njengomlandu. 5 Ikanti emuntwini ongasebenziyo kodwa ethemba uNkulunkulu owenza ababi balunge, ukukholwa kwakhe kubalwa njengokulunga. 6 UDavida utsho lutho lunye lapho ekhuluma ngokubusiseka komuntu uNkulunkulu ambalela ukulunga ngaphandle kwemisebenzi, esithi:

7 “Babusisiwe labo abaziphambeko zabo zithethelelwe, abazono zabo zembesiwe.

8 Ubusisiwe umuntu iNkosi engayikumbalela isono sakhe.”

9 Ukubusiseka lokhu ngokwabasokileyo kuphela, kumbe njalo lakwabangasokanga na? Kade sisithi ukukholwa kuka-Abhrahama kwabalwa kuye njengokulunga. 10 Kwabalelwa kusiphi isimo na? Kwakungemva kokuba esesokile, loba ngaphambili na?

11 Wamukela isibonakaliso sokusoka, uphawu lokulunga aba lalo ngokulunga engakasoki. Ngakho-ke unguyise wabo bonke abakholwayo kodwa bengasokanga, ukuze ukulunga kubalelwe kubo. 12 Njalo unguyise wabasokileyo futhi, abangasokanga nje kuphela kodwa abahamba ezinyathelweni zokholo ubaba u-Abhrahama ayelalo engakasoki.

13 Kwakungayisingomthetho ukuthi u-Abhrahama lenzalo yakhe amukele isithembiso sokuthi uzakuba yindlalifa yomhlaba, kodwa ngokulunga okuza ngokukholwa. 14 Ngoba uma labo abaphila ngomthetho beyizindlalifa, ukukholwa kakulasizo lesithembiso siyize,

15 ngoba umthetho uletha ulaka. Njalo lapho okungelamthetho khona akukho kona.

16 Ngakho, isithembiso siza ngokukholwa, ukuze sifike ngomusa njalo siqiniseke kuyo yonke inzalo ka-Abhrahama – hatshi kulabo abangabomthetho kuphela kodwa njalo lakulabo abangabokholo luka-Abhrahama. Ungubaba wethu sonke.

17 Njengoba kulotshiwe ukuthi: “Sengikwenze waba nguyise wezizwe ezinengi.” Ungubaba emehlweni kaNkulunkulu, akholwa kuye – uNkulunkulu onika abafileyo ukuphila abize izinto ezingekho kungathi zikhona.

18 Kungekho themba, u-Abhrahama ngethemba wakholwa ngalokho waba nguyise wezizwe ezinengi, njengoba kwakutshiwo kuye ukuthi, “Izakuba njalo inzalo yakho.”

19 Engabanga buthakathaka ekukholweni kwakhe, wamelana lobuqotho bokuthi umzimba wakhe wawusufana lofileyo – njengoba wayeseleminyaka ephosa ibe likhulu ubudala – kanye lokuthi isizalo sikaSara laso sasifile.

20 Waqiniswa ekukholweni kwakhe wapha udumo kuNkulunkulu,

21 evumile ngokupheleleyo ukuthi uNkulunkulu wayelamandla okwenza lokho ayekuthembisile.

22 Yikho nje “kwabalelwa kuye njengokulunga.” 23 Amazwi athi “kwabalelwa kuye” kawalotshelwanga yena yedwa, 24 kodwa lathi futhi, uNkulunkulu azabalela kubo ukulunga – kithi esikholwa kuye yena owavusa uJesu iNkosi yethu kwabafileyo. 25 Wanikelwa ekufeni ngenxa yezono zethu njalo wavuselwa ekuphileni ukuze silungiswe.